ரூ.500, ரூ.1,000 நோட்டு செல்லாது என்ற பிரதமர் மோடியின் அறிவிப்பு தொடர்பாக அவர் மீது பாராளுமன்ற அவமதிப்பு நோட்டீஸ் அளிக்க மார்க்சிஸ்டு ஆலோசித்து வருகிறது.

இதுபற்றி மார்க்சிஸ்டு பொதுச் செயலாளர் சீதாராம் யெச்சூரி டெல்லியில் நிருபர்களிடம் கூறியதாவது:-
பணம் செல்லாது என்ற முக்கிய கொள்கை முடிவை பிரதமர் மோடி பாராளுமன்றத்துக்கு வெளியே அறிவித்தார். இதையடுத்து ஜனாதிபதி, மோடியை வரவழைத்து இதுபற்றி விவாதித்தார். இதுபோன்ற நிலையில், பிரதமர் பாராளுமன்றத்தின் இரு அவைகளுக்கும் வந்து இதுகுறித்து விளக்கம் அளித்து இருக்கவேண்டும். அது அவருடைய பதவியின் கடமையும் ஆகும்.
ஆனால் அதை பிரதமர் செய்யவில்லை. இது பாராளுமன்ற அமைப்பு முறையை அவமதிப்பது போல் உள்ளது.

எனவே, இது தொடர்பாக மோடி மீது பாராளுமன்ற அவமதிப்பு நோட்டீஸ் அளிப்பதற்கான வாய்ப்புகள் உள்ளதா? என்பது குறித்து சட்ட நிபுணர்களின் கருத்துகளை கேட்டு வருகிறோம். இதுபற்றி அனைத்து எதிர்க்கட்சிகளுடன் ஆலோசனை நடத்துவோம்.