நீதிபதிகள் மீது பொய் புகார் உச்ச நீதிமன்றம் கண்டனம்

நீதிபதிகள் மீது கூறப்படும் குற்றச்சாட்டுகளில் பெரும்பாலானவை பொய்யாக உள்ளன’ என உச்ச நீதிமன்றம் தெரிவித்துள்ளது.

‘உயர் நீதிமன்றங்களில் தற்காலிக நீதிபதிகளை நியமித்து தேங்கியுள்ள வழக்குகளில் எண்ணிக்கையை குறைக்க வேண்டும்’ எனக் கோரி உச்ச நீதிமன்றத்தில் தொண்டு நிறுவனம் ஒன்று மனு தாக்கல் செய்துள்ளது. இந்த மனு மீதான விசாரணை தலைமை நீதிபதி எஸ்.ஏ.பாப்டே தலைமையிலான அமர்வு முன் நேற்று நடந்தது.
மனுதாரர் சார்பில் ஆஜரான மூத்த வழக்கறிஞர் விகாஸ் சிங் கூறுகையில் ”ஓய்வு பெற்ற நீதிபதிகளை குறிப்பிட்ட காலத்துக்கு தற்காலிக நீதிபதிகளாக நியமித்து வழக்குகளை விசாரிக்க வைக்கலாம்” என்றார்.இதற்கு பதில் அளித்து நீதிபதிகள் கூறியதாவது:தற்காலிக நீதிபதிகளாக செயல்படுவதை ஓய்வு பெற்ற நீதிபதிகளில் பெரும்பாலோர் விரும்புவதில்லை. அவர்கள் மத்தியஸ்த வழக்குகளில் தான் ஆர்வம் காட்டுகின்றனர். எனினும் இது பற்றி அவர்களிடம் ஆலோசிக்கப்படும்.

நீதிபதிகள் பணிக்காலம் பாதுகாப்பாக இருக்க வேண்டும் என்பது மிகவும் முக்கியம். ஏனெனில் நீதிபதிகள் மீது கூறப்படும் குற்றச்சாட்டுகளில் பலவும் பொய் என்பது அதிர்ச்சி அளிக்கிறது.அதிலும் தற்காலிக நீதிபதிகளுக்கு பணிபாதுகாப்பு எதுவும் இல்லை. அதனால் தற்காலிக நீதிபதிகள் பணிகாலத்தை உறுதி செய்ய வேண்டியது அவசியம். இவ்வாறு நீதிபதிகள் கூறினர்.